မိဘအမွေ

ကျွန်မတို့မိဘတွေက ဟိန္ဒူဘာသာ၀င်တွေပါ ။

မိဘတွေသေဆုံးသွားချိန်မှာ သားသမီး ၅ ယောက်အနက် အကိုတစ်ယောက်နဲ့ ညီမတစ်ယောက်ပဲကျန်ပါတယ် ။

ကျန်တဲ့ မောင်နှမတွေလည်း ဆုံးသွားပါပြီ။ သားသမီး တွေတော့ ကျန်ပါတယ် ။ အကိုဖြစ်သူက မိဘအမွေကို သမီးမိန်းကလေးတွေနဲ့မဆိုင်ဘူး၊မပေးနိုင်ဘူးလို့ ပြော နေပါတယ် ။ မိဘတွေက သေတမ်းစာ မရေးခဲ့ဘူးဆိုရင် မိဘတွေထားခဲ့တဲ့ အမွေတွေကို ကျန်ရစ်တဲ့ သားသမီး ၅ယောက် ညီတူမျှတူ ခွဲဝေရမှာလား ။ ဘယ်လို လုပ်ရမလဲဆိုတာကို ပြောပြပေးစေချင်ပါတယ် ။

========================

မြန်မာဓလေ့ထုံးတမ်းဥပဒေနဲ့ ဟိန္ဒူဓလေ့ထုံးတမ်းဥပဒေနဲ့က ကွဲပြားတယ်ဆိုတာ တစ် အချက်အနေနဲ့သိရပါ မယ်။ နောက် ၂ အချက်က မြန်မာနိုင်ငံတရားဥပဒေများအက်ဥပဒေ ပုဒ်မ ၁၃ (၁) အရ မြန်မာနိုင်ငံအတွင်းမှာ ရှိနေတဲ့ ဟိန္ဒူဘာသာဝင်တွေရဲ့ အမွေဆက်ခံရေး၊ ထိမ်မြားလက်ထပ်ရေး၊ မျိုးနွယ်ရေး၊ ဘာသာရေးတွေ အား လုံးကို ဟိန္ဒူဓလေ့ထုံးတမ်းဥပဒေအရပဲ အဆုံးအဖြတ်ပြုရမှာဖြစ်ပါတယ်။ ဟိန္ဒူဓလေ့ထုံးတမ်းဥပဒေကို ကြည့် လိုက်ရင် ပူးတွဲပိုင်ဆိုင်တဲ့ မိသားစုပုံစံကို အခြေခံထားပါတယ်။ အဲ့တော့ အမွေရှင်ရဲ့သား၊ သူ့သားရဲ့သား၊ မြေး ဖြစ်တာပေါ့။ သားရဲ့ သားရဲ့သား၊ မြစ် အဲလိုမျိုးပုံစံနဲ့ မိသားစုတွေက သွေးတူတဲ့ ပုံစံမျိုးဖြစ်ကြပြီးတော့ အမွေ ရှင်ရဲ့ အမွေကို သွေးတူသူတွေက ဆက်ခံတာဖြစ်တယ်။ အဲဒါက ဒုတိယအချက်ပေါ့။

အဲ့တော့ မေးခွန်းအရ ကွယ်လွန်တဲ့သားသမီးတွေက မိဘတွေနောက်မှာ ကွယ်လွန်ရင်တော့ သေတဲ့သူတွေရဲ့ သားသမီးမြေး၊ မြစ်တွေက အမွေဆက်ခံခွင့်ရမယ်။ ဒါပေမဲ့ မိဘတွေအရင် ကွယ်လွန်ရင်တော့ ကိုယ်စားပြု ဆက်ခံနိုင်ခွင့် မရှိတဲ့အတွက်ကြောင့် အမွေမရနိုင်ပါဘူး။ နောက်တစ်ခါ ဟိန္ဒူတွေရဲ့ ဓလေ့ထုံးတမ်းက ခုနက ပြောတဲ့ သားရဲ့သားရဲ့သား ဆိုတဲ့အတိုင်းပဲ သားယောက်ျားလေးဖြစ်တဲ့ အစ်ကို ရှိနေတဲ့အတွက်ကြောင့် မို့လို့ သမီးမိန်းကလေးဖြစ်တဲ့ ညီမဖြစ်တဲ့သူက အမွေရခွင့် မရှိပါဘူးလို့ပဲဖြေကြားချင်ပါတယ်။

Crd

(Dvb law lab )ကူးယူဖော်ပြပါသည်။

#ဥပဒရေးရာ #ဟိန္ဒူအမွေဆက်ခံရေး