မမေ့နိုင်ဖွယ် မြင့်မြတ်တဲ့ အတိတ်တွေရှိခဲ့တဲ့ ပြာသိုလပြည့်နေ့လေးအကြောင်း

မမေ့နိုင်ဖွယ် မြင့်မြတ်တဲ့ အတိတ်တွေရှိခဲ့တဲ့ ပြာသို လပြည့်နေ့လေး အကြောင်း 
🙏🙏🙏🙏🙏🙏🙏🙏🙏🙏🙏🙏🙏🙏

       ပြာသိုလပြည့်နေ့ကို ရှင်တစ်ထောင် အခါတော်နေ့  အဖြစ်လည်း ဗုဒ္ဓဘာသာဝင်များက သတ်မှတ်ထား ကြပါတယ် ။
မဟာသက္ကရာဇ် ၁၀၃ ခုနှစ် ၊ ပထမ ဝါကျွတ်ပြီးတဲ့ အချိန်မှာ မြတ်စွာဘုရားရှင်ဟာ  ရသေ့တစ်ထောင်ကို ချွတ်ရန်အတွက် 
ဥရုဝေလတောသို့ တန်ဆောင်မုန်း လပြည့်နေ့မှာ ကြွရောက်ခဲ့ပါတယ် ။

       ပြာသိုလပြည့်နေ့အထိ ၂လကြာ သီတင်းသုံးပြီး ရသေ့များကို သံသရာမှ လွတ်မြောက်စေရန် စည်းရုံးခဲ့ပါတယ်။  
ဥရုဝေလတောမှာ အစ်ကိုကြီး ဥရုဝေလကဿပ ဦးဆောင်တဲ့ ရသေ့က ငါးရာရှိပြီး ၊ အစ်ကိုလတ် နဒီကဿပ ဦးဆောင်တဲ့ 
ရသေ့က သုံးရာနှင့် ညီငယ် ဂယာကဿပ ဦးဆောင်တဲ့ ရသေ့က နှစ်ရာ ရှိပါတယ် ။ ဥရုဝေလကဿပ နှင့်တကွ 
ရသေ့အားလုံးတို့က  မီးလှုံခြင်း ၊ ရေငုပ်ခြင်း စသည့် ပဉ္စာတပ အကျင့်များကို ကျင့်ကြံကာ ကိလေသာ ခေါင်းပါးလိမ့်မယ်လို့ လွဲမှားစွာ မှတ်ယူထားကြပါတယ်။

       မြတ်စွာဘုရားရှင်က မီးအိုးကင်း ၅၀၀ ကို တန်ခိုးတော်ဖြင့် ဖန်ဆင်းခြင်း ၊ ရသေ့များ ခွဲ၍ မကွဲသော ထင်းတုံးငါးရာ အား 
တစ်ပြိုင်နက် ကွဲစေခြင်း ၊ ရသေ့များ မွှေး၍ မရသောမီးကို တစ်ပြိုင်နက် တောက်လောင်စေခြင်း ၊ ရသေ့များငြိမ်း၍ မရသော 
မီးငါးရာအား တပြိုင်နက် ငြိမ်းစေခြင်း စသည့်ဖြင့် တန်ခိုးတော် စုစုပေါင်း ( ၃၅၁၆ ) မျိုးကို ပြသပြီး ရသေ့များအား 
ဆွဲဆောင်တော် မူခဲ့ရာ ရသေ့အပေါင်းတို့ကလည်း သူတို့ရဲ့ အသုံးအဆောင် ပစ္စည်းများ အားလုံးကို နေရဉ္ဇရာ မြစ်အတွင်းသို့ 
စွန့်ပစ်လိုက်ကြပြီး ဘုရားရှင်ထံ၌ ရဟန်းအဖြစ်ကို တောင်းခံခဲ့ ကြပါတော့တယ် ။

 
       ပထမအကြိမ် ဥရုဝေလကဿပ နှင့် တပည့်များ ၊ ဒုတိယအကြိမ် နဒီကဿပ နှင့် တပည့်များ ၊ တတိယအကြိမ် ဂယာကဿပနှင့် တပည့်များက သာသနာ့ဘောင်သို့ ဝင်ရောက်ခဲ့ကြပြီး ရသေ့တစ်ထောင်လုံး ဧဟိဘိက္ခု ရဟန်းများ ဖြစ်လာကြတော့တယ် ။ ပြာသိုလပြည့်နေ့တွင် မြတ်စွာဘုရားက ဂယာသီသ ကျောက်ဖျာပြင်ပေါ်မှ"အာဒိတ္တ ပရိယာယ သုတ္တန် ဒေသနာ " ကို ဟောကြားတော်မူရာ ရဟန်းအားလုံး အာသဝေါ ကုန်ခမ်း၍ အရဟတ္တဖိုလ်သို့ ဆိုက်ရောက်ခဲ့ကြပါတယ်။

        ရှင်အပါးတစ်ထောင် ဗုဒ္ဓသာသနာအတွင်း ဝင်ရောက်ခဲ့သည်ကို အကြောင်းပြု၍ ပြာသိုလပြည့်နေ့အား ဗုဒ္ဓဘာသာဝင်တို့က
" ရှင်တစ်ထောင် အခါတော်နေ့ " ဟူ၍ သတ်မှတ်ခဲ့ကြခြင်း ဖြစ်ပါတယ် ။ ရှင်တစ်ထောင်ကျွတ်ပွဲကို အကြောင်းပြု၍ မြန်မာလူမျိုး  ဗုဒ္ဓဘာသာဝင်များဟာ ပြာသိုလပြည့်နေ့မှာ မြတ်စွာဘုရားရှင်အား ဆီမီး တစ်ထောင် ၊ ပန်းတစ်ထောင် ၊ ရေတော်တစ်ထောင် ၊ ဆွမ်းတစ်ထောင် ၊ သစ်သီးတစ်ထောင် စသည်တို့ဖြင့်  ပူဇော်ကာ ကုသိုလ်ယူကြပါတယ် ။

        ပြာသိုလပြည့်နေ့ကို ဆရာကြီး ဦးသုခက အမေများနေ့ အဖြစ် သတ်မှတ်ပေးခဲ့ပါတယ် ။ ဆရာကြီးရဲ့  ကြိုးပမ်းမှု့ကြောင့် 
မြန်မာ့ပြက္ခဒိန်မှာ ပြာသိုလပြည့်နေ့ဟာ အမေများနေ့အဖြစ် မှတ်တမ်းတင်နိုင်ခဲ့ပါတယ် ။ 

         မာတာပိတုဂုဏော အနန္တော ဆိုသည်အတိုင်း အမေကို ဘုရားနှင့်နှိုင်း တစ်ဂိုဏ်းတည်းထားကာ အရိုအသေ ပေးကြရပါတယ်။
အမေကျေးဇူးဟာ သားသမီးတွေ အတွက် ဆပ်လို့ မကုန်နိုင်အောင် များပြား ကျယ်ပြန့် လှပါတယ် ။
အမေ့များနေ့လေးမှာပဲ ဖြစ်ဖြစ် ဘယ်နေ့ရက်မှာ မဆို အမေ့ကို တန်ဖိုးထား လေးစားဂရုစိုက်ရမှာက သားသမီးတို့ရဲ့ တာဝန်ဝတ္တရား တစ်ခုပါ ။