#ခရစ်ယာန် ဘာသာ၀င်များ ကွာရှင်းခြင်း -

#ခရစ်ယာန် ဘာသာ၀င်များ ကွာရှင်းခြင်း -
         ခရစ်ယာန် ဘာသာ၀င်များသည် နှစ်ဦး သဘောတူ ကွာရှင်းခြင်း ပြုလုပ်ခွင့်မရှိပေ။
ခရစ်ယာန် ဘာသာ၀င်များ အတွက် ကွာရှင်းပြတ်စဲလိုလျှင် မြန်မာနိုင်ငံ လင်မယားကွာရှင်းရေး ဥပဒေအရသာ ကွာရှင်းခွင့်ရခြင်း ဖြစ်ပါသည်။ 
၁။ ထိမ်းမြားမှု ပယ်ဖျက်ခြင်း။
၂။ ထိမ်းမြားမှု ပျက်ပြယ်စေခြင်း။
၃။ တရားရုံး ဒီကရီဖြင့် ခင်ပွန်းနှင့် ခွဲနေစေခြင်း ။ စသည် အကြောင်းပြချက်များဖြင့်သာ ခရိုင်ရုံး ၊ တိုင်းဒေသကြီး တရားလွှတ်တော်တို့တွင်သာ တရားစွဲဆိုရမည်ဖြစ်ပါသည်။ 
ထိမ်းမြားမှု ပယ်ဖျက်ခြင်းကိစ္စ -
        အောက်ပါ အကြောင်းပြချက်များဖြင့် ထိမ်းမြားမှု ပယ်ဖျက်ပေးရန် ခရိုင်တရားရုံး သို့မဟုတ် တိုင်းဒေသကြီး တရားလွှတ်တော်သို့လျှောက်ထားနိုင်သည်။
( ၁ ) လင်ယောကျာ်း ဖြစ်သူသည် ၄င်း၏ဇနီးသည် ထိမ်းမြား လက်ထပ်ပြီးနောက် တစ်ပါးယောကျာ်း နှင့်ဖောက်ပြား ကျူးလွန်ပါသည်ဟူသော အကြောင်းပြချက်ဖြင့် ဖြစ်စေ ၊
(၂) ဇနီးဖြစ်သူသည် ၄င်း၏ယောကျာ်းသည် ထိမ်းမြားလက်ထပ်ပြီးနောက် ခရစ်ယာန် ဘာသာမှ အခြားဘာသာသို့ ကူးပြောင်းကိုးကွယ်သည့်အပြင် တခြား မိန်းမတစ်ဦးနှင့် ထိမ်းမြားမှု တစ်ရပ်ပြုလုပ်ခဲ့ပါသည် ဟူသော အကြောင်းပြချက်ဖြင့် ဖြစ်စေ ၊
( ၃ ) သွေးနီးလွန်းသူနှင့် ဖောက်ပြန်ခြင်း အကြောင်းပြချက်ဖြင့် ဖြစ်စေ ၊
( ၄ ) နောက်မယား ယူခြင်းနှင့် ဖောက်ပြန်ခြင်း အကြောင်းပြချက်ဖြင့် ဖြစ်စေ၊
( ၅ ) နောက်မိန်းမ တစ်ဦးနှင့် ထိမ်းမြားခြင်းနှင့် ဖောက်ပြန်ခြင်းဖြင့် ဖြစ်စေ၊
( ၆ ) မုဒိမ်းမှု ၊ ယောက်ျားခြင်း မေထုန်မှီဝဲမှု ၊ တိရစ္ဆာန် နှင့် မေထုန်မှီဝဲမှု ကျူးလွန်ပါသည် ဟူသော အကြောင်းပြချက်ဖြင့် ဖြစ်စေ ၊ 
( ၇ ) မိန်းကလေးတစ်ဦးနှင့် ဖောက်ပြန်ခြင်း ၄င်းအပြင် ကွာရှင်း ခွင့်ပြုနိုင်လောက်သော ရက်စက်မှု ကျူးလွန်ခြင်းဟူသော အကြောင်းပြချက်ဖြင့် ဖြစ်စေ၊
( ၈ ) မိန်းမတစ်ဦးနှင့် ဖောက်ပြန်ခြင်း အပြင် ၄င်းအား (၂) နှစ်နှင့်အထက် စွန့်ပစ်ထားခြင်း ဟူသော အကြောင်းပြချက်ဖြင့် ဖြစ်စေ၊ စသည့် အကြောင်းပြချက် များဖြင့်သာ ထိမ်းမြားမှု ပယ်ဖျက်ပေးရန် လျှောက်ထားနိုင်ပါသည်။
ထိမ်းမြားမှု ပျက်ပြယ်စေခြင်း -
  အောက်ပါ အကြောင်းများဖြင့် ထိမ်းမြားမှု ပျက်ပြယ်ကြောင်း ကြေညာပေးရန် ခရိုင်တရားရုံး (သို့မဟုတ်) တရားလွှတ်တော် သို့ တင်သွင်းနိုင်သည်။ 
( ၁ ) တရားပြိုင်သည် ထိမ်းမြားစဉ်က ပန်းသေရောဂါ ရှိနေကြောင်းနှင့် တရားစွဲဆိုသည့် အချိန်တွင် ပန်းသေရောဂါ ရှိနေကြောင်း ၊ 
( ၂ ) ထိမ်းမြားကြ သူတို့သည် ထိမ်းမြားခြင်း မပြုရန် တားမြစ်ထားသည့် သွေးနီးတော်စပ် သူများဖြစ်ကြောင်း၊
( ၃ ) ထိမ်းမြားသူ တစ်ဦးဦးသည် ထိမ်းမြားစဉ်က စိတ်မနှံံ့သူ ဖြစ်ကြောင်း၊
( ၄ ) ထိမ်းမြားသူ၏ ယခင်အိမ်ထောင်သည် ထိမ်းမြားစဉ် အသက်ရှင်လျက် ရှိကြောင်း နှင့် ယခင်အိမ်ထောင်ရေးမှာ တည်မြဲနေလျက် ရှိကြောင်း ၊ စသည့် အကြောင်းပြချက်များဖြင့် တင်သွင်းနိုင်သည်။ 
ခရိုင်တရားသူကြီးက ထိမ်းမြားမှု ပျက်ပြယ်ကြောင်း ချမှတ်သည့် ဒီကရီသည် တရားလွှတ်တော်၏ အတည်ပြုချက် ရရန်လိုအပ်ပါသည်။ 
တရားရုံး ဒီကရီဖြင့် ခင်ပွန်းနှင့် ခွဲနေစေခြင်း -
အောက်ပါ အကြောင်းများဖြင့် တရားရုံးဒီကရီဖြင့် ခင်ပွန်းနှင့် ခွဲနေစေခြင်းကို ခရိုင်တရားရုံး (သို့မဟုတ်) တရားလွှတ်တော်သို့ တင်သွင်းနိုင်သည်။
 (၁ ) လင်ယောကျာ်း (သို့) မယားဖြစ်သူသည် မိမိအိမ်ထောင်ဖက်မှ တစ်ပါးသူနှင့် ဖောက်ပြန်ခြင်း၊ 
( ၂ ) ရက်စက်မှု ကျူးလွန်ခြင်း 
( ၃ ) လုံလောက်သော အကြောင်း တစ်စုံတစ်ရာ မရှိဘဲ (၂) နှစ် သို့မဟုတ် (၂) နှစ်အထက် စွန့်ပစ်ထားခဲ့ခြင်း ဟူသော အကြောင်းပြချက်ဖြင့် ဖြစ်စေ ၊ တရားရုံးဒီကရီဖြင့် ခင်ပွန်းနှင့် ခွဲနေစေခြင်း ကိုလျှောက်ထားနိုင်ပါသည်။
credit