✨လူတိုင်းမသိသေးသော ရှမ်းပြည်နယ်ရှိ လူမျိုးစုများ📍

✨လူတိုင်းမသိသေးသော ရှမ်းပြည်နယ်ရှိ လူမျိုးစုများ📍
မြန်မာနိုင်ငံမှာ တိုင်းရင်းသားလူမျိုးစု 135 မျိုးထဲကမှာ ရှမ်းပြည်နယ်မှာ နေထိုင်ကြတာ ဘယ်လူမျိုးတွေဖြစ်မလဲ🤔 ?
ရှမ်းပြည်နယ်တွင် နေထိုင်ကြသော လူမျိုးစုအားလုံးကို မသိသေးသော ကျွန်တော့်လို ရှမ်းပြည်သားများအပါအဝင် ရှမ်းပြည်(အထူးသဖြင့် ကလောမြို့လေး )ကိုချစ်သော ကျွန်တော့် မိတ်ဆွေများ လေ့လာနိုင်ဖို့ ဗဟုသုတရရှိစေဖို့ ရှမ်းပြည်နယ်ရှိ လူမျိုးစုများကို ရှာဖွေစုစည်းပြီး ဖော်ပြပေးလိုက်ရပါတယ်ဗျ😻😻
( 1 ) ရှမ်းလူမျိုး 
      ရှမ်းကုန်းမြေမြင့်ဒေသတွင်  အများဆုံးနေထိုင်ကြပြီး   ချင်းတောင်တန်း ၊  ရခိုင်ပြည်နယ်နှင့် တနင်္သာရီကမ်းရိုးတန်း ဒေသများမှအပ  မြန်မာနိုင်ငံ အနှံ့အပြားတွင်  ပြန့်နှံ့နေထိုင်ကြသည်။
( 2 ) ယွန်းရှမ်းလူမျိုး
      ရှမ်းပြည်နယ်အရှေ့ပိုင်း ကျိုင်းတုံနယ် ၊ တာချီလိတ် ဒေသတဝိုက်တွင် နေထိုင်ကြသည်။
( 3 ) ခန္တီးရှမ်းလူမျိုး 
     မြန်မာနိုင်ငံမြောက်ဖျား ခန္တီးလုံခေါ် ပူတာအိုခရိုင် နှင့် မိုးကောင်းမြို့နယ် ၊ မိုးညှင်း ၊ မြစ်ကြီးနား ၊ ဟုမ္မလင်းတို့တွင် ပြန့်နှံ့နေထိုင်သည်။
( 4 ) တောင်ရိုးလူမျိုး
      ရှမ်းပြည်နယ်တောင်ပိုင်းတွင် အများဆုံး နေထိုင်ကြပြီး ပအိုဝ့်ကိုယ်ပိုင်အုပ်ချုပ်ခွင့်ရ ဒေသများဖြစ်သော ပင်လောင်းမြို့နယ် ၊  ဟိုပုံးမြို့နယ်နှင့်  ဆီဆိုင်မြို့နယ် တွင်လည်းကောင်း ၊  တောင်ကြီး မြို့နယ် ၊ ကလောမြို့နယ်နှင့် နမ့်စမ်မြို့နယ်တို့တွင် ပြန့်နှံ့နေထိုင်သည်။
( 5 ) ဓနုလူမျိုး
     ရှမ်းပြည်နယ် မြေလတ်ပိုင်း ၊ အရှေ့ပိုင်း ၊ အင်းလေးကန်၏ အရှေ့ဘက် ၊ အနောက်ဘက် တောင်တန်းတကြောတွင် နေထိုင်ပြီး ကိုယ်ပိုင်အုပ်ချုပ်ခွင့်ရ ဒေသဖြစ်သော ရွာငံနှင့် ပင်းတယမြို့ နယ်တို့တွင် အများဆုံးနေထိုင်ကြသည်။ ရှမ်းပြည်တောင်ပိုင်း ကလော ၊ ရပ်စောက် ၊ အောင်ပန်း ၊ ရွာငံ ရေဦး ၊ ပွေးလှ ၊ ပင်းဒယ ၊ ကျူံး ၊ ပင်မှီ ၊ ဘော်ဆိုင်း စသည် မြို့နယ်ကျေးရွာများတွင် နေထိုင်ကြသည်။
( 6 ) တအောင်း ( ပလောင် )လူမျိုး 
      ကိုယ်ပိုင်အုပ်ချုပ်ခွင့်ရ ဒေသဖြစ်သော ရှမ်းပြည်နယ်မြောက်ပိုင်းရှိ နမ့်ဆန် ၊ မန်တုံမြို့နယ်တို့ တွင်အများအပြား နေထိုင်ကြသည်။ ရှမ်းပြည်နယ်မြောက်ပိုင်းရှိ လားရှိုးမြို့နယ် ၊ သိန်းနီမြို့နယ် ၊ သီပေါမြို့နယ် ၊ နောင်ချိုမြို့နယ် ၊  ကွတ်ခိုင်မြို့နယ် ၊  မူဆယ်မြို့နယ် ၊  နမ့်ခမ်းမြို့နယ်တို့တွင် အများဆုံး နေထိုင်ကြသည်။
( 7 ) အင်းသားလူမျိုး
       ရှမ်းပြည်တောင်ပိုင်း ၊ တောင်ကြီးခရိုင် ညောင်ရွှေမြို့နယ် ၊ အင်းလေးကန် တစ်ဝိုက်ကျေးရွာများတွင် အများဆုံးနေထိုင်ကြပြီး ညောင်ရွှေ ၊ တောင်ကြီးနှင့် ကယားပြည်နယ်တို့တွင် ပြန့်ကျဲ နေထိုင်ကြသည်။
( 8 )  ပအိုဝ့်လူမျိုး       
      ရှမ်းပြည်နယ်တွင် ဒုတိယလူဦးရေ အများဆုံးဖြစ်ပြီး ၎င်းတို့၏ ကိုယ်ပိုင်အုပ်ချုပ်ခွင့်ရ ဒေသဖြစ်သော ဟိုပုံး ၊ ဆီဆိုင်နှင့် ပင်လောင်းတို့တွင် အများဆုံး နေထိုင်ကြသည်။မြန်မာနိုင်ငံအောက်ပိုင်း သထုံခရိုင် ၊ တောင်ငူခရိုင် ၊ ပဲခူးခရိုင် ၊ ဘားအံ့ခရိုင် ၊  ကော့ကရိတ် မြို့နယ်နှင့် ကယားပြည်နယ် တို့တွင်လည်းနေထိုင်ကြသည်။
( 9 ) ကွီလူမျိုး 
      မိုင်းဆတ် ၊ မိုင်းပန် ဒေသများနှင့် ကျိုင်းတုံမြို့ အနီးတဝိုက်တွင် နေထိုင်ကြသည်။
( 10 ) ထနော့လူမျိုး 
        ရှမ်းပြည်တောင်ပိုင်း ၊ ကလောမြို့နယ် ၊ တောင်ပို့လှရွာ ၊ သအယ်သစ်ရွာတို့တွင် သီးသန့် နေထိုင်ကြပြီး တောင်ကြီးမြို့နယ် ၊ အေးသာယာမြို့အနီး နောင်အင်ရွာ ၊ ချောင်းကြားရွာ ၊ ဘုရားဦးရွာ ၊ သစ်ပင်ထောင်ရွာ ၊ သိမ်ကုန်းရွာ ၊ ဘန့်ကုန်းရွာ ( သို့မဟုတ် )ရွာသစ်ကုန်းရွာတို့တွင် အနည်းငယ် နေထိုင်ကြသည်။
( 11 ) ပလေးလူမျိုး
        ရှမ်းပြည်တောင်ပိုင်း ၊ လွယ်လင်ခရိုင် ၊ မိုင်းကိုင် မြို့နယ်နှင့် ကလောမြို့နယ် အတွင်းပိုင်းတွင် နေထိုင်ကြသည်။
( 12 ) အာခါ
        ရှမ်းပြည်နယ်အရှေ့ပိုင်းရှိ တောင်စောင်းများပေါ်တွင် အများဆုံးနေထိုင်ကြသည်။
( 13 ) ကိုးကန့်လူမျိုး
        ကိုယ်ပိုင်အုပ်ချုပ်ခွင့်ရ ဒေသဖြစ်သော ကုန်းကြမ်း နှင့် လောက်ကိုင်မြို့နယ်တို့တွင် အများဆုံး နေထိုင်ကြသည်။
( 14 ) ဂုံ ( ခွန် ) လူမျိူး 
        ဂုံရှမ်းများသည် ကျိုင်းတုံမြို့နယ်တွင် အများဆုံးနေထိုင်ကြပြီး သံလွင်မြစ် အရှေ့ဘက်ခြမ်းရှိ မြို့နယ်အသီးသီးသို့လည်း  ပြန့်နှံ့ရောက်ရှိ နေထိုင်ကြပါသည်။
( 15 ) မြောင်ဇီးလူမျိုး 
       ရှမ်းပြည်နယ်မြောက်ပိုင်း ကိုးကန့်နယ် ၊ ဝနယ်နှင့် ကျိုင်းတုံနယ်တဝိုက်တွင် နေထိုင် ကြသည်။  နောင်ချိုမြို့နယ် ၊ ဟိုပန်မြို့နယ် ၊ လောက်ကိုင်မြို့နယ် ၊  မိုးကုတ်မြို့နယ် ၊  မိုင်းနောင်မြို့နယ် ၊ ဝမ်းစိမ်းမြို့နယ်နှင့် လားရှိုးမြို့နယ်တို့တွင် အနည်းငယ်စီ အခြေချ နေထိုင်ကြ သည်။
( 16 ) ယင်းကြားလူမျိုး 
        ရှမ်းပြည်နယ်တောင်ပိုင်း ကျေးသီး ၊ မန်ဆန်နယ် ၊ ပင်လုံမြို့နယ် အနီးတဝိုက် တောင်တန်းဒေသ ၊ ရှမ်းပြည်မြောက်ပိုင်း ၊ မိုးနဲနယ်ရှိ သံလွင်မြစ်အနောက်ဘက် တောင်ကုန်းများ နှင့် ကျိုင်းတုံနယ်တို့တွင် ပြန့်နှံ့ နေထိုင်ကြပါသည်။
( 17 ) ယင်းနက်လူမျိုး 
         ပင်လုံနယ် ၊ မိုးနဲ ၊ ကျေးသီး ၊ မန်ဆန်နှင့် လဲခြားမြို့နယ် ကျေးရွာများတွင် နေထိုင်ကြသည်။
( 18 ) ရှမ်းကလေး ( ထမန် ) လူမျိုး
         မြန်မာနိုင်ငံအထက်  ချင်းတွင်းခရိုင်၏မြောက်ဘက် ရှမ်း ၊  ကချင်နှင့်  ချင်းနယ်မြေတို့ဆုံရာ ဒေသတွင် နေထိုင်ကြသည်။ ထမန်လူဦးရေမှာ နည်းပါးလှပေရာ ထမန်းရွာဟူ၍ နာဂတောင်တန်း  ခရိုင် ၊ ဟုမ္မလင်းနယ်တွင်  တစ်ရွာတည်းသာရှိ၏။  အထက်ချင်းတွင်းခရိုင်၏ မြောက်စူးစူးရှိ ရွာကလေးများ၌လည်း ထမန်းလူမျိုး အနည်းငယ် တွေ့ရသည်။
ထမန်းတို့သည်  ရှမ်းလူမျိုးများဖြစ်ကြပြီး  တစ်ချိန်က အင်းတော်ကြီးအိုင် ဖြစ်လာမည့်နေရာတွင်  စည်ခမ်းအမည်ရှိသည့်မြို့ ကို  တည်ထောင် နေထိုင်ခဲ့ကြသည်။  စည်ခမ်းမြို့ ရေအောက်ရောက်သွား ပြီးနောက် ကျန်ခဲ့သော  အဆက်အနွယ်များသည်  အနောက်ဘက်သို့ ရွှေ့ပြောင်းသွားကြပြီး အခြားသူများနှင့် သွေးနှောခြင်းမပြုဘဲ ( အခြားသူများကလည်း ယင်းတို့နှင့် သွေးနှောခြင်းမပြု ) သီးခြား နေထိုင်ခဲ့ကြသည်။
( 19 ) လားဟူ လူမျိုး 
        ဘီစီ(၆၀၀)ခန့်အထိ တရုတ်နိုင်ငံ အနောက်တောင်ပိုင်းတွင် နေထိုင်ခဲ့ကြသည်။  လူဦးရေ များပြားလာသည်နှင့်အမျှ   ပြောင်းရွှေ့နေထိုင်လာခဲ့ကြရာ   မဲခေါင်မြစ် ၊  သံလွင်မြစ်ကြောင်း အတိုင်း စုန်ဆင်းလာပြီး တရုတ်ပြည်တောင်ပိုင်း ၊ ရှမ်းပြည်နယ် ၊ ထိုင်းနိုင်ငံနယ်စပ်ဒေသများသို့ ရောက်ရှိ နေထိုင်ခဲ့ကြသည်။ ရှမ်းပြည်နယ်အရှေ့ပိုင်း တာကော်မှစ၍ ကျိုင်းတုံနယ် အရှေ့ဖျားတလျှောက်ရှိ ကျေးရွာတွင် လည်း နေထိုင်ကြသည်။
( 20 ) အိုက်ဆွယ်လူမျိုး
          သံလွင်မြစ်အရှေ့ဘက်ကမ်း ဝနယ် ၊ မိုင်းမောမြို့ အနီးတဝိုက်တွင် နေထိုင်ကြသည်။ တရုတ်နီ နယ်စပ်တွင် ပိုမိုများပြားလာသည်။
( 21 ) တိုင်းလွယ်လူမျိုး 
         ရှမ်းပြည် အရှေ့ပိုင်းခရိုင် ၊ ကိုးကန့်နယ် အတွင်းပိုင်းနယ် ၊ ကျိုင်းထုံ မြောက်ပိုင်းနှင့် မိုင်းလုံ အရှေ့ပိုင်း တောင်ပေါ်ဒေသများတွင် နေထိုင်ကြသည်။
( 22 ) တိုင်းလျမ်လူမျိုး
        မြန်မာပြည်အထက်ပိုင်း ကောလင်း ၊ ဝန်းသို ၊ ထီးချိုင့် ၊ ပင်လယ်ဘူး ၊ အင်းတော် ၊ ဗန်းမောက် ၊ ကသာ ၊ မိုးညှင်း ၊ မိုးကောင်း ၊ ဗန်းမော် ၊ အင်းတော်ကြီး ၊ မြစ်ကြီးနား ၊ ဝိုင်းမော် ၊ ဆင်ဘို ( တာလောကြီး ) ၊ ဟိုပင် ၊ ဟုမ္မလင်းနှင့် သောင်သွပ်ဒေသ ၊ ဟောင်းပါး ၊ လုံးခင်း ၊ ဖားကန့် စသည့်ဒေသများနှင့် ချင်းတွင်းမြစ်ဝှမ်းဒေသ များတွင် ကျယ်ပြန့်စွာ နေထိုင်ကြသည်။
( 23 ) မိုင်းသာလူမျိုး           
        ရှမ်းပြည်နယ် နှင့် ကချင်ပြည်နယ်ရှိ ဗန်းမော် ၊ မြစ်ကြီးနား ၊ နမ်းခမ်း နှင့် ကျိုင်းတုံဒေသ ၊ ရှမ်းပြည်နယ် အရှေ့မြောက်ပိုင်း နမ်းခမ်းနယ် ၊ တရုတ်-မြန်မာနယ်ခြား ကျောက်တိုင်အမှတ် (၄၂)  အနီး ရွှေလီမြစ် ဝဲယာ ကမ်းတစ်လျှောက်တွင် အများဆုံး အခြေစိုက်နေထိုင်ပြီး တရုတ်နိုင်ငံ ယူနန်နယ်အတွင်း၌လည်း နေထိုင်ကြသည်။
( 24 ) မောရှမ်း ( မြောက်ပိုင်းရှမ်း ) လူမျိုး 
         ရှမ်းပြည်မြောက်ပိုင်း ၊ မြောက်သိန္နီ ၊ တောင်သိန္နီ ၊ သီပေါ ၊ မိုးမိတ် ၊ လားရှိုးနှင့် အရှေ့မြောက် နယ်စပ်တွင် နေထိုင်ကြသည်။
( 25 ) ဝလူမျိုး        
        ကိုးကန့်နယ် ၊ ဝနယ်နှင့် ကျိုင်းထုံနယ်များတွင် အများဆုံး နေထိုင်ကြသည်။ ရှမ်းပြည်နယ် အရှေ့မြောက်ပိုင်းဒေသ နှင့် ရှမ်းပြည်နယ် အရှေ့ပိုင်းဒေသတို့တွင် ပြန့်နှံ့နေထိုင်ကြသည်။
        ရိုးသားတဲ့တောင်ရိုး ဓနုလူမျိုးတွေ အနေများတဲ့ ကလောမြို့လေးမှာ လှပတဲ့ ခြံဝန်းလေးနဲ့  နေထိုင်ဖို့ အိပ်မက်လေးရှိတယ်ဆိုရင်တော့ janak realestate ကိုသာ ဆက်သွယ်လိုက်ပါဗျ ။ ကလောမြို့က ကြိုက်တဲ့နေရာလက်ညှိုးထိုး အဆင်ပြေအောင် ဆောင်ရွက်ပေးမှာမို့  စိတ်ချလက်ချ ဆက်သွယ်နိုင်ပါတယ်ဗျ။