ငွေချေးမည်ဆိုလျှင်-
13-Aug-21
လင်နှင့် မယားနှစ်ဦးစလုံးကို တရားစွဲဆိုနိုင်ရန်အတွက် ငွေချေးရာတွင် လင်မယားနှစ်ဦး စလုံးကို လက်မှတ်ရေးထိုးခိုင်းသင့်ပါသည်။
ငွေချေးရာတွင် လင် (သို့) မယားတစ်ဦးတည်းနာမည်ဖြင့် ငွေချေးသည့်ကိစ္စများရှိသည် ။
ထိုသို့ချေးခြင်းသည် ချေးစဉ်အခါ၌ပြဿနာ တစ်စုံတစ်ရာမရှိသော်လည်း အကြောင်းကြောင်းကြောင့် ငွေပြန်မဆပ်သဖြင့် တရားစွဲဆိုသည့်အခါတွင် များစွာပြဿနာဖြစ်လေ့ရှိပါသည်။
ထိုသို့အခက်အခဲကြုံရခြင်းမှာ လင် (သို့) မယား တစ်ဦးထဲကို ငွေချေးငှားထားလျှင် တရားစွဲ ဆိုသည့်အခါ လင် (သို့) မယား တစ်ဦးတည်းကိုသာ စွဲဆိုကြရပါသည်။
ထိုအဆင့်တွင် ပြဿနာမပေါ် သေးသော်လည်း အနိုင်ဒီကရီရရှိပြီးနောက် ဇာရီမှုတွင် တရားရှုံးပိုင်ပစ္စည်းများကို လေလံတင် ရောင်းချပြီး ဒီကရီကိုအတည်ပြုသည့်အခါ ၎င်း၏ အိမ်ထောင်ဖက်ဖြစ်သူ လင် (သို့) မယား၏ ဝေစုအား ရောင်းချ၍ မရသဖြင့် အခက်အခဲများစွာကြုံတွေ့ရတတ်ပါသည်။
ငွေချေးစဉ်က ပါဝင်ခြင်းမရှိသော လင် (သို့) မဟုတ်မယားအား တရားမမှုတွင် ထည့်သွင်းစွဲဆို မည်ဆိုပါကလျှင် ထည့်သွင်းစွဲဆိုခွင့် မရှိသဖြင့် အောက်တွင်ဖေါ်ပြထားသော စီရင်ထုံးအရ တရားပြိုင် အဖြစ်မှ ဖယ်ထုတ်ခြင်းခံရပါလိမ့်မည်။
သို့ရာတွင် မိသားစုလုပ်ငန်းတွင် လင်ကသာ ဦးဆောင်လုပ်ကိုင်စေကာမှု ချေးငွေမှာ မိသာစု လုပ်ငန်းအတွက်ဖြစ်လျှင် မယားဖြစ်သူကိုပါ တရားပြိုင်အဖြစ်ထည့်သွင်းစွဲဆိုနိုင်ကြောင်း နိုင်ငံတော် ကူသန်းရောင်းဝယ်ရေးဘဏ်နှင့် ဦးဖိုးဒန် ( ၁၉၆၆ ၊ မတစ ၂၅၂ ) စီရင်ထုံးတွင် တွေ့မြင်နိုင်ပါသည်။ မည်သို့ပင်ဖြစ်စေ လင်မယားနှစ်ဦးစလုံးအား တရားစွဲဆိုနိုင်ရန်အတွက်ရည်ရွယ်ကာ ငွေချေးရာတွင် လင်နှင့်မယားနှစ်ဦးစလုံးပါဝင်လက်မှတ်ရေးထိုးထားစေသင့်ပါသည်။
Credit
ဆက်လက်ဖော်ပြပါမည်။
www.yuzanarland.com ဟာ မိတ်ဆွေအတွက်ပါ။
