တိုက်ခန်း လက်ရောက်ရလိုမှု

တိုက်ခန်း လက်ရောက် ရလိုမှု

          ( မိခင်ပိုင် တိုက်ခန်းကို မိခင်၏ ခွင့်ပြုချက် ၊ လွှဲအပ်ချက် တစ်စုံတစ်ရာ မရှိဘဲ သားဖြစ်သူက ရောင်းချခြင်းသည် တရားဝင်အတည် မဖြစ်ခြင်း )

+++++++++++++++++++++++++++++++++++++++

      “ Nemo dat quod non habet ” ဥပဒေဆိုရိုး အရ မည်သူမျှ မိမိတွင် မရှိသော အခွင့်အရေးကို သူတပါးအား မအပ်နှင်း နိုင်ပေ။ ထို့ကြောင့် ပစ္စည်း လွှဲပြောင်းပေးရန် အခွင့်အရေး မရှိသူက လွှဲပြောင်းပေးခြင်းသည် တရားဝင် အတည် မဖြစ်ချေ ။

တိုက်ခန်း ဖြစ်စေ ၊ မြေ ဖြစ်စေ ၊ ကား ဖြစ်စေ မည်သည့်ပစ္စည်း ဖြစ်စေ အရောင်းအဝယ် ပြုလုပ်တဲ့ အခါမှာ ရောင်းသူသည် ရောင်းပိုင်ခွင့်ရှိသူ ဖြစ်ရပါမည် ။

          ရောင်းသူသည် ရောင်းပိုင်ခွင့်ရှိသူဖြစ်မှ ဝယ်ယူသူသည် ဝယ်ယူသည့် ပစ္စည်းအပေါ် တရားဝင် ပိုင်ဆိုင်ခွင့် ရှိမည်ဖြစ်ပါသည် ။ ရောင်းပိုင်ခွင့်ရှိသူ ဆိုသည်မှာ ပစ္စည်းအပေါ် အလုံးစုံ ပိုင်ဆိုင်သူကို ဆိုလိုပါသည် ။

ထိုသို့ ရောင်းပိုင်ခွင့်ရှိသူထံမှ ဝယ်ယူခြင်း မဟုတ်ဘဲ မပိုင်သူထံမှ ဝယ်ယူမိ၍ တိုက်ခန်း လက်လွတ် ဆုံးရှုံးသွားရသည့် အမှုတစ်ခု ရှိခဲ့ဖူးပါသည် ။

           အမှုဖြစ် တိုက်ခန်းမှာ အမေဖြစ်သူ ဒေါ်တင်မော်က ပိုင်ဆိုင်သည့် တိုက်ခန်း ဖြစ်သည် ။ အဆိုပါ တိုက်ခန်းတွင် ခေတ္တနေထိုင်ခွင့်ပြုပါရန် သားဖြစ်သူ ဦးတင်ထွန်းဝင်းက ခွင့်တောင်းသဖြင့် မိခင်ဖြစ်သူက နေထိုင်ခွင့် ပြုခဲ့သည် ။ ထို့နောက်တွင် မိခင်ဖြစ်သူက နိုင်ငံခြား သွားရောက်လည်ပတ်စဉ်တွင် သားဖြစ်သူက တိုက်ခန်းအား ဦးမြင့်သိန်းနှင့် ဒေါ်ဆွေဆွေတို့ထံ ရောင်းချလိုက်သည် ။ မိခင်ဖြစ်သူက နိုင်ငံခြားမှ ပြန်ရောက်၍ တိုက်ခန်းအား သွားကြည့်ရာ ဦးမြင့်သိန်းတို့ နေထိုင်နေသည်ကို တွေ့ရ၍ တိုက်ခန်းမှ ထွက်ခွာ ဖယ်ရှားပေးရန် ပြောကြား သော်လည်း လိုက်နာမှု မရှိသဖြင့် ဦးမြင့်သိန်းတို့ အပေါ်  “ တရားလို ပိုင်ဆိုင်သော တိုက်ခန်း အတွင်းသို့ ကျူးကျော် ဝင်ရောက် နေထိုင်သော တရားပြိုင်များအား ဖယ်ရှား ထွက်ခွာပေးစေလိုမှု ” ဖြင့် ရန်ကုန်တိုင်း တရားရုံးတွင် တရားစွဲဆိုသည်။

            ဦးမြင့်သိန်းတို့က ဦးတင်ထွန်းဝင်းထံမှ တရားဝင် ဝယ်ယူထားခြင်း ဖြစ်၍ ကျူးကျော်သူ မဟုတ်ကြောင်းဖြင့် ခုခံချေပသည်။

နောက်ဆုံးတွင် တရားရုံးချုပ်က ဦးတင်ထွန်းဝင်းသည် မိခင်ဖြစ်သူ ဒေါ်တင်မော်၏ ခွင့်ပြုချက် ၊ လွှဲအပ်ချက် တစ်စုံတစ်ရာ မရှိဘဲ မိမိပိုင်ဆိုင်လေဟန်ဖြင့် လွှဲပြောင်း ရောင်းချခဲ့ခြင်း ဖြစ်ကြောင်း သုံးသပ်၍ ဒေါ်တင်မော် စွဲဆိုသည့်အတိုင်း အနိုင်ဒီကရီ ချပေးလိုက်သည်။

အမှုအား သုံးသပ်ရသော် ဤအမှုတွင် နစ်နာသူမှာ ဦးမြင့်သိန်းတို့ ဖြစ်သည် ။ 

            ၎င်းတို့အနေဖြင့် ဦးတင်ထွန်းဝင်းသည် တိုက်ခန်းအား တရားဝင် ပိုင်ဆိုင်သူဟု ထင်မှတ်မိ၍ တန်ရာတန်ကြေးပေးကာ ဝယ်ယူခဲ့သည် ။ ဝယ်ယူပြီးနောက် အမှုဖြစ်သည့် အခါမှ ဦးတင်ထွန်းဝင်းသည် အမှန်တကယ် ပိုင်သူ မဟုတ်သည်ကို သိခဲ့ရသည် ။ အခါနှောင်းမှ သိလိုက်ရသည် ဖြစ်၍ သိလိုက်ရသည့်အချိန် တိုက်ခန်းအားလက်လွတ် ဆုံးရှုံးခဲ့ရလေပြီ ။ ၎င်းတို့အနေဖြင့် ဦးတင်ထွန်းဝင်းအပေါ်  တိုက်ခန်းဖိုးငွေ နှင့် နစ်နာကြေးငွေ ရလိုမှုဖြင့် တရားစွဲဆိုတောင်းခံနိုင်သော်လည်း အချိန်ကုန် ငွေကုန် ဖြစ်ရပေအုံးမည်။

          သို့ဖြစ်၍ တိုက်ခန်းဝယ်မည် ဆိုက ရောင်းသူသည် ရောင်းပိုင်ခွင့်ရှိသူ ဟုတ် မဟုတ်ကို သေချာစွာ စိစစ်ပြီးမှ ဝယ်ယူသင့်ပါကြောင်း တင်ပြလိုက်ပါသည်။

    ကိုးကား ၂၀၀၄ မတစ ၈၉

Credit ( ဥပဒေရေးရာ )