စာချုပ်ချုပ်မည်ဆိုလျှင် မှတ်ပုံတင်ကို မစိစစ်ခဲ့သည့် ကိစ္စ

စာချုပ်ချုပ်ရာတွင် လက်လွတ်စပယ် လုပ်ဆောင်နေကြသော လုပ် ဆောင်ချက်တစ်ခုမှာ စာချုပ်သူတို့၏ အမည် မှတ်ပုံတင်တို့ကို စာချုပ်ချုပ်သူများ ကိုယ်တိုင်က မစိစစ်ဘဲ ချုပ်ဆိုပေးလိုက်ကြသည့် ကိစ္စရပ်ပင် ဖြစ်သည်။

စာချုပ်ချုပ်ပေးသူ၊ ရေးပေးသူများသည် စာချုပ်ချုပ်ဆိုသူများ၏ အမည်၊ မှတ်ပုံတင်၊ နေရပ်လိပ်စာတို့ကို မေးမြန်းရာတွင် ထိုသူတို့၏ ပြောဆိုချက်ကိုသာ စာချုပ်တွင် ဖော်ပြ ရေးသားလေ့ရှိပြီး ထိုသူပြောသကဲ့သို့ ထို သူ၏ အမည်၊ မှတ်ပုံတင် ၊ မှန် မမှန်ဆိုသည်ကို မလေ့လာ ၊မစူးစမ်း ၊ မစိစစ်ဘဲ ရှိတတ်ကြပါသည်။

သာမန်စာချုပ်မျာတွင် အရေးမကြီးလှဟု ဆိုသော်လည်း မိမိက ရရန် ရှိသော ကိစ္စရပ်များဖြစ်ပါမူ စိစစ်ရန် လိုအပ်ပါသည်။

ဤသို့ဆိုခြင်းဖြင့် စာချုပ်ချုပ်ရာတွင် မိမိအတွက် ရရန်ရှိသော စာချုပ်ချုပ်ရာတွင် တစ်မျိုး၊ မိမိက ပေးရန်ရှိ သော စာချုပ်ချုပ်ရာတွင် တစ်မျိုး၊ သဘောထား အမျိုးမျိုး ထားရှိရမည်ဟူ၍ ဆိုလိုခြင်း မဟုတ်ပါ။ တာဝန်ယူ ချုပ်ဆိုပေးသူများ ၊ တာဝန်ကျေရန် ၊ အမှားအယွင်း ချို့ယွင်းချက် နည်းနိုင်သမျှ နည်းပါးစေရန် သတိပေးရခြင်း ဖြစ်ပြီး သာ၍ပင် စိစစ်ရန် သင့်သည့်အပိုင်းကို ရည်ညွှန်း ဖော်ပြခြင်း ဖြစ်ပါသည်။ မိမိက ရရန်ရှိသည်ပင် ဖြစ်စေ၊ ပေးရန်ရှိသည်ပင်ဖြစ်စေ စာချုပ်ပြုလုပ်မှတော့ ပြုလုပ်ရကျိုးနပ်အောင် စာချုပ်ချုပ်မှု အပိုင်းနှင့်ဆိုင်သည်များကို ပီပီပြင်ပြင် တိတိကျကျ လုပ်ဆောင်ကြရန် လိုပါမည်။

အချိန်ကိုလုပြီး ချုပ်ရတာဖြစ်လို့ ။ အားနားလို့ ၊ မလိုဘူးထင်လို့ --- - ဆိုသည့် ဆင်ခြေများနှင့်အတူ နောင် တစ်ဖန် မဖြစ်မိရန် အရေးကြီးပါသည်။

နမူနာအနေဖြင့် အဖြစ်အပျက်တစ်ခုကို တင်ပြပါမည်။ မြေကွက်တစ်ကွက်ကို ရောင်းမည်ဖြစ်၍ ဝယ်မည့်သူ က ပိုင်ဆိုင်ခွင့်စာချုပ် အထောက် အထားများကို တောင်းကြည့်ပါသည်။ ရောင်းသူက ပိုင်ဆိုင်ခွင့်စာချုပ် စာတမ်း များ အားလုံးကို ပြသပါသည်။ စာချုပ်စာတမ်း အထောက် အထားများအရ ပိုင်သူ၏ အမည်သည် ဦးနီ ဖြစ်ပါ သည်။ ရောင်းသူကလည်း ၎င်းကိုယ်၎င်း ဦးနီဟု ဆိုပါသည်။ ၎င်းနှင့်အတူ ရှိသူများကလည်း ၎င်းအားဦးနီ၊ ဦးနီ ဟူ၍ ခေါ်ဝေါ် သုံးနှုန်းကြပါသည်။ ထို့ကြောင့် စာချုပ် စာတမ်း ပိုင်ခွင့်များကို ပြသနေသူမှာ ၊ ဦးနီဟုပင် ယူဆ စရာ ဖြစ်ပါသည်။

ပြသသော စာချုပ်စာတမ်းများ အထောက်အထားများ အခိုင်အမာ အစစ် အမှန် ဖြစ်သည်ကို စိတ်ချယုံကြည် သဖြင့် ဝယ်သူက ဝယ်ရန်သဘောတူပါသည်။ ရောင်းဝယ်သော မြေ၏ ရောင်းဈေးမှာ ငွေကျပ် သိန်း ၄၀၀၀ ဖြစ်ပြီး စရန်ပေး စာချုပ် ပြုလုပ်ချိန်တွင် စရန်ငွေတစ်ဝက်ဖြစ်သော ငွေကျပ် သိန်း၂၀၀၀ ကို စာချုပ်ပြုလုပ်၍ ပေးအပ်ပါသည်။ ရောင်းသူ ဦးနီက စရန်ငွေရရှိကြောင်း စာချုပ်တွင် လက်မှတ်ရေးထိုး ပေးပြီး ငွေကျပ် သိန်း၂၀၀၀ကို ရယူ လိုက်ပါသည်။

စရန်းပေး စာချုပ်ချုပ်ရာတွင် ရောင်းသူနေရာ၌ ဦးနီဟု စာချုပ်ကို ရေး သားသူက ဖော်ပြပါသည်။ ဦးနီ၏ မှတ် ပုံတင်ကို များသောအားဖြင့် ပိုင်ဆိုင်မှု စာချုပ်စာတမ်းတွင် ပါရှိသည့် မှတ်ပုံတင်အတိုင်း ပြန်လည် ရေးကူးဖော် ပြကြ ပါသည်။ အချို့ကလည်း ရောင်းသူအား မှတ်ပုံတင်နံပါတ်ကိုမေး၍ ရောင်းသူ ရွတ်ပြသည့်အတိုင်း စာချုပ် တွင် ရေးတတ်ကြပါသည်။

မှတ်ပုံတင် ခဏလောက်ပြပါ ဟူ၍ တောင်းယူကြည့်သူ လွန်စွာ နည်း ပါးသည်ကို တွေ့ရပါသည်။ တချို့ ထိုသို့ တောင်းသောအခါ ရောင်းသူ များက ၎င်း၏ မှတ်ပုံတင် ဘယ်သူယူသွားလို့ ၊ ဘယ်ရောက်နေလို့ ဆို သည်များကို အကြောင်းပြ ပြောဆိုကာ တိုက်ဆိုင်စစ်ဆေးမှုကို ရှောင်လွဲတတ် သည် များလည်း ရှိပါ သည်။ ဤ သို့ဆိုလျှင် အထူး သတိထားစရာ ဖြစ်ပါသည်။

အထက်ပါ ကိစ္စရပ်တွင် စာချုပ်စာတမ်း အစစ်အမှန်များ ပြသနိုင်သည့် အတွက် ပိုင်ဆိုင်သူ အစစ်အမှန် ပုဂ္ဂိုလ်ဟု ထင်မြင်ယူဆကာ ဦးနီ အမှတ်နှင့် စာချုပ်ပြုလုပ်၍ စရန်ငွေများ ချပေးလိုက်ခြင်း ဖြစ်ပါသည်။ ပစ္စည်း နှင့် ပတ်သက်သည့် စာချုပ်စာတမ်းများကိုသာ ဟုတ် မဟုတ် ၊ မှန် မမှန် စိစစ်ကြည့်ပြီး ရောင်းသူနှင့် ပတ်သက် သည့် လူပုဂ္ဂိုလ်အစစ် ဟုတ်မဟုတ် ၊ မှန်မမှန်ကို မစိစစ်မိခဲ့သည့်အတွက် ကိုယ်ကျိုးနည်းခဲ့ရသည့် သာဓကများ အဖြစ်အပျက်များ များစွာရှိပါကြောင်း တင်ပြရင်း ချုပ်သူတို့၏ မှတ်ပုံတင်ကို မစိစစ်ဘဲ မချုပ်မိစေရန် လက်တို့ သတိပေးလိုက်ရပါသည်။

(စာညွှန်း - ဦးကျော်ဇေယျ၊ စာချုပ်ချုပ်ဆိုမည်ဆိုလျှင် ဆောင်ရန်နှင့်ရှောင်ရန်များ ၊ စာ ၅၆ Credit#DVBLawLab