Advertise here!

မိဘက သားသမီးတစ်ဦးကို အမွေခွဲဝေပေးခဲ့ပြီးရင် ထပ်မံအမွေရ ခွင့်ရှိပါသေးသလား”

မိဘက သားသမီးတစ်ဦးကို အမွေခွဲဝေပေးခဲ့ပြီးရင် ထပ်မံအမွေရ ခွင့်ရှိပါသေးသလား”
မိဘက သားသမီးတစ်ဦးကို အမွေခွဲဝေပေးခဲ့ပြီးရင် ထပ်မံအမွေရ ခွင့်ရှိပါသေးသလား”ဟု မိတ်ဆွေတစ်ဦး၏ သမီးဖြစ်သူက စာရေးသူထံ လာရောက်မေးမြန်းဆွေးနွေးခြင်းဖြစ်ပါသည်။
“မိသားစု စီမံမှုကတိစာချုပ် ချုပ်ဆိုပြီး ဆောင်ရွက်တာတော့ရှိတယ်။ ဥပဒေအရတော့ မိသားစု စီမံမှုက မိဘများ ကွယ်လွန်မှ ကျန်ရစ်တဲ့ သားသမီးများအမွေခွဲဝေခွင့်ရမှာ ဖြစ်တယ်။ ဘယ်လို ကိစ္စများရှိနေလို့လဲ””
“ကျွန်မတို့မှာ မောင်နှမသုံးဦးရှိပါတယ်။ ကျွန်မက အလတ်ဖြစ်တယ် ဆရာ။ အစ်ကိုကြီး မကွယ်လွန်မီက ငွေကြေးလိုအပ်လို့ အမွေခွဲပေးခဲ့တယ် ဆရာ။ အခုအမေဆုံးတော့ အစ်ကိုကြီး ဇနီးက အမွေရခွင့်ရှိပါသေးသလား”
“အဖေဖြစ်သူက ဦးစွာကွယ်လွန်ခဲ့တာ မဟုတ်လား”
“ဟုတ်ပါတယ် ဆရာ။ အစ်ကိုကြီးက ကင်ဆာရောဂါဖြစ်တော့ အမေ့ဆီကနေ အမွေကြိုတောင်းတာ ဆရာ။ ဥပဒေအရလည်းသားအကြီး ဖြစ်လို့ ကြိုတင်ရပိုင်ခွင့်ရှိတယ်လို့ ပြောတာပဲ ဆရာ””
“ဖခင်ကွယ်လွန်သွားပြီး အကြီးဆုံးကသားဖြစ်ရင် သြရသသားအဖြစ် ဥပဒေအရ ကြိုတင်အမွေတောင်း ခွင့်ရှိမှာ ဖြစ်ပါတယ်”
“ဒါကြောင့် ဖြစ်မယ်ထင်တယ်။ အမေက အိမ်ငှားတင်ထားတဲ့ တိုက်ခန်းကို ရောင်းပြီးပေးလိုက်တယ် ဆရာ”
“တစ်ခုတော့ ရှိတာပေါ့။ ဥပဒေ နဲ့အညီ ခွဲဝေပေးခဲ့ရင်တော့ ပြဿနာမရှိဘူးပေါ့”
“ဥပဒေနဲ့အညီ အမွေခွဲပေးခဲ့မယ်ဆိုတာက ဘယ်လိုလဲဆရာ”
“ဥပဒေနဲ့ အညီဆိုရင်တော့ သြရသအခွင့်အရေးနဲ့ အညီခွဲဝေပေး ထားခဲ့မယ်ဆိုရင်တော့ ပိုကောင်းတာပေါ့”
“ဥပဒေနဲ့အညီဆိုရင် ဘယ်လို ခွဲဝေခံစားခွင့်ရှိပါသလဲ”
“ဖခင်ကွယ်လွန်လျှင် သြရသ သားသည်လည်းကောင်း၊ မိခင်ကွယ်လွန်လျှင် သြရသ သမီးသည်လည်း ကောင်း အမွေ၏ လေးပုံတစ်ပုံရခွင့်ရှိတယ်လို့ မောင်သိန်းမောင်နှင့် မကြွယ် ရန်ကုန်တရားစီရင်ထုံး အတွဲ - ၁၃ စာမျက်နှာ ၄၁၂ မှာ ထုံးဖွဲ့ထားပါတယ်”
“ဒါဆိုရင် လေးပုံတစ်ပုံကြိုတင် ခွဲဝေပေးရမယ့် သဘောပေါ့”
“ဟုတ်ပါတယ်။ အခုကိစ္စမှာ တိုက်ခန်းကို ရောင်းပြီးခွဲပေးလိုက် တယ်ဆိုတာက ဘယ်လိုခွဲပေးလိုက်တာလဲ”
“သားသမီး သုံးဦးအညီအမျှခွဲ ယူလိုက်တာဆရာ။ ဆရာပြောသလို အမွေရဲ့ လေးပုံတစ်ပုံသာရခွင့်ရှိတယ် ဆိုတော့ သုံးပုံခွဲဝေပေးလိုက်တာ အစ်ကိုကြီးဘက်က မနစ်နာနိုင်ပါဘူး”
“ဒီလိုတွက်ရင်တော့ တစ်မျိုးပေါ့။ ဒါပေမယ့် ဥပဒေအရဆိုရင်တော့ အမွေပစ္စည်းအားလုံးအပေါ် လေးပုံတစ်ပုံ ရခွင့်ရှိမှာ ဖြစ်ပါတယ်။ ကျန်တဲ့ အမွေပစ္စည်းပေါ်မှာ တန်ဖိုးသတ်မှတ် ခွဲဝေပေးခဲ့တာရှိသလား”
“အတွင်းပစ္စည်းအနေနဲ့ကလည်း အစ်ကိုကြီး အိမ်ထောင်ကျတော့ အစ်ကိုကြီးဝတ်ဆင်ထားတဲ့ လက်စွပ်ဆွဲကြိုး တွေပေးလိုက်တယ်။ အဖေဆုံးတော့လည်း အမေက ချွေးမအတွက် ရွှေလက်ကောက်တွေပေးလိုက်သေးတယ် ထင်တယ်။ သေချာတော့ မမှတ်မိတော့ဘူး”
“ကြီးကြီးမားမား အိမ်မြေ၊ တိုက်ခန်းတွေကျန်ရစ်ခဲ့သေးလား”
“သမီးတို့ အခုနေတဲ့ အိမ်နဲ့မြေတော့ ကျန်တာပေါ့ဆရာ။ ဒါကလည်း အမေရှိစဉ်ကဆိုတော့ ရောင်းချခွဲဝေလို့က မဖြစ်ဘူးလေ”
“ဒါဆိုရင် အခုအိမ်နဲ့ မြေကို တန်ဖိုးဖြတ်ပြီး ကြိုတင်ခွဲဝေပေးခဲ့တာ မရှိဘူးပေါ့”
“ဒါပေမယ့် ဆရာ။ အစ်ကိုကြီးက နောက်နောင်အမွေတောင်းဆိုခြင်း မပြုပါဘူးလို့ ကတိစာချုပ်မှာ လက်မှတ် ရေးထိုးပေးခဲ့တယ် ဆရာ”
“ဥပဒေအရဆိုရင်တော့ သြရသရဲ့ အခွင့်အရေးဟာ အပြီးအပိုင်ရရှိတဲ့ အကျိုးခံစားခွင့်ဖြစ်တယ်။ သြရသ သားသမီးသည်မိဘ တစ်ဦးဦး ကွယ်လွန်စဉ်က မိမိဝေစုကို ရရှိပြီးဖြစ်လျှင် ကျန်ရစ်သူမိဘ နောက်အိမ် ထောင်ပြုသည့်အခါဖြစ်စေ၊ ကွယ်လွန်သည့်အခါဖြစ်စေ၊ အမွေထပ်မံတောင်းဆိုခွင့်မရှိလို့ မောင်ဖိုးမြနှင့် မလှ ရန်ကုန်တရားစီရင်ထုံး အတွဲ -၇ စာမျက်နှာ ၄၀၉ အမှုမှာ ဆုံးဖြတ်ထားပါတယ်”
“ဒါဆိုရင် အခု အမေကွယ်လွန်တဲ့အခါမှာ အစ်ကိုကြီး သက်ရှိထင်ရှားရှိခဲ့ရင်လည်း အမွေထပ်မံရခွင့် မရှိတော့ ဘူးပေါ့နော်”
“မှန်ပါတယ်။ ဒါပေမယ့် သမီးတို့ အမွေခွဲဝေပေးလိုက်တာက အမွေပုံပစ္စည်းအားလုံးပေါ်မှာ အမွေခွဲဝေပေးခဲ့ခြင်း မဟုတ်တဲ့အတွက် ဥပဒေ ပြဿနာလေးတစ်ခုတော့ရှိလာတာပေါ့”
“ဒါဆိုရင် ဘယ်လိုများဖြစ်လာနိုင်သလဲ ဆရာ”
“အခုကိစ္စမှာ သားကြီးက မိခင် မကွယ်လွန်မီ ကွယ်လွန်ခဲ့တာ မဟုတ်လား”
“ဟုတ်ပါတယ် ဆရာ၊ အမေမကွယ်လွန်မီ ကွယ်လွန်သွားတာပါ။ အမေကလည်း သားဖြစ်သူ ကျန်းမာရေး မကောင်းတော့ခွဲဝေပေးလိုက်တဲ့ သဘောပါ။ ဒါ့အပြင် ဆေးဖိုးသက်သက်ကို အမေက ထုတ်ပေးပါတယ်။ ပြီးတော့ အစ်ကိုကြီးတို့နေတဲ့ တိုက်ခန်းဝယ်စဉ်ကလည်း ငွေလိုတယ်ဆိုလို့ အမေက စိုက်ထုတ်ပေးခဲ့တာ လည်း ရှိတယ်”
“အစ်ကိုကြီးရဲ့ ဇနီးသည်က တောင်းဆိုလာလို့လား”
“သမီးကလည်း အမေမကွယ်လွန်မှီ
ခြောက်လခန့်က အိမ်ထောင်ပြုလိုက်တယ် ဆရာ။ အငယ်မောင်လေးက လည်း မကြာခင် အိမ်ထောင်ပြုတော့မှာ ဆိုတော့””
“ဒီအိမ်နဲ့ မြေကိုရောင်းပြီး အမွေခွဲဝေမယ်လို့ စိတ်ကူးထားတယ်ပေါ့” စာရေးသူက မိန်းကလေး၏ စကား မဆုံးမီမှာ ဖြတ်၍ ပြောလိုက်ခြင်းဖြစ်သည်။
“ဟုတ်ကဲ့ ဆရာ။ အိမ်ရောင်းမယ်လို့ သတင်းကြားတာနဲ့ ရပ်ကွက်ရုံးနဲ့ မြို့တော်စည်ပင်သာယာရေး ကော်မတီ မြေယာဌာနမှာ အမွေဆိုင် အိမ်ဖြစ်တဲ့အတွက် ရောင်းချခြင်း၊ လွှဲပြောင်းခြင်းမပြုဖို့ ကန့်ကွက်စာတင်ထားတယ် ဆရာ”
“မြန်မာ့ဓလေ့ထုံးတမ်းဥပဒေမှာ လင်နှင့်မယားသည် သားသမီးထွန်းကားခြင်းမရှိဘဲ တစ်ဦးဦး ကွယ်လွန်သွား လျှင် ကျန်ရစ်သူသည် ကွယ်လွန်သူ၏ မိဘလက်ဝယ်ရှိ ပစ်္စည်းကို အမွေဆက်ခံခွင့်မရှိလို့ မောင်အုန်းခင်နှင့် ဦးညို ရန်ကုန် တရားစီရင်ထုံး အတွဲ ၁၀ စာမျက်နှာ - ၁၂၄ မှာ ဆုံးဖြတ်ထုံးဖွဲ့ထားပါတယ်””
“ကွယ်လွန်သွားတဲ့ အစ်ကိုကြီးမှာ သားသမီး မကျန်ခဲ့ဘူး ဆရာ”
“အဲဒါတော့ သမီးတို့ရဲ့ ကုသိုလ်ကံလို့ ပြောရမှာပဲ။ ခင်ပွန်းဖြစ်သူက မိခင်ထက် စောကွယ်လွန်တာဖြစ်လို့ ချွေးမဖြစ်သူက အမွေရခွင့်မရှိပါဘူး။ ဒါပေမယ့် သားသမီးကျန်ခဲ့ရင်တော့ အမွေရှင်ရဲ့ မြေးတော်စပ်သွားမှာ ဖြစ်တယ်”
“မြေးတစ်ဦးဦးကျန်ခဲ့ရင်တော့ အမွေထပ်ခွဲပေးရမယ့် သဘောပေါ့နော်”
“ဟုတ်ပါတယ်။ အမွေမမီမြေးအဖြစ် တောင်းဆိုကန့်ကွက်ခွင့်ရှိလာမှာ ဖြစ်ပါတယ်။ အခုကိစ္စမှာတော့ မြေးအဖြစ် မကျန်ရစ်ခဲ့တဲ့အတွက် ချွေးမမှာ ခံစားခွင့်မရှိလို့ ရဲရဲဝံ့ဝံ့ အိမ်မြေကို ရောင်းချနိုင်ပါတယ်”ဟု အကြံပြုဆွေး နွေးလိုက်ပါသည်။
Credit: ထီယု (ဥပဒေအတိုင်ပင်ခံ)ကူးယူဖော်ပြပါသည်။

Related Posts

'နောက်အိမ်ထောင်ပြုလိုက် ရင် ပထမအိမ်ထောင်က အမွေရပိုင် ခွင့် ရှိပါသေးသလား'

'နောက်အိမ်ထောင်ပြုလိုက် ရင် ပထမအိမ်ထောင်က အမွေရပိုင် ခွင့် ရှိပါသေးသလား'

'နောက်အိမ်ထောင်ပြုလိုက် ရင် ပထမအိမ်ထောင်က အမွေရပိုင် ခွင့် ရှိပါသေးသလား''ဟု မိတ်ဆွေ တစ်ဦးက စာရေးသူထံ လာရောက် ဆွေးနွေးပါသည်။''ဘယ်လိုအခြေအနေမျိုးဖြစ် လို့လဲ၊ ပထမ အိမ်ထောင်နဲ့ လက်ထက် ပွားပစ္စည်းဆိုရင်တော့ ပထမဇနီး ခင်ပွန်းနဲ့ ထက်ဝက်စီအမွေဝေစုရခွင့် ရှိပါ...

အမွေရှင်က သူတစိမ်းအားအမွေပစ္စည်းအားလုံးကိုပေးကမ်းခြင်း

အမွေရှင်က သူတစိမ်းအားအမွေပစ္စည်းအားလုံးကိုပေးကမ်းခြင်း

မြန်မာဓလေ့ထုံးတမ်းဥပဒေ- ပဋိညာဉ်ဥပဒေပုဒ်မ ၂၃ ပါ “ ဥပဒေ ” ဆိုသောစကားရပ်- မြန်မာနိုင်ငံတရား ဥပဒေများ ဆိုင်ရာဥပဒေပုဒ်မ ၁၃ (၁) - မြန်မာဗုဒ္ဓဘာသာဝင်များအကြား အငြင်းပွားနေသော အမွေဆက်ခံသည့် ကိစ္စနှင့်စပ်လျဉ်းသည့်ဓမ္မသတ်ပါ ပြဋ္ဌာန်းချက်များသည် ဥပဒေဖြစ်သည့်အလျ...

မိဘအမွေ မဆက်ခံနိုင်သည့်သားသမီးများ

မိဘအမွေ မဆက်ခံနိုင်သည့်သားသမီးများ

မြန်မာဓလေ့ထုံးတမ်းဥပဒေတွင် မိဘသည် သားသမီးများအားအမွေမှ မပယ်ထုတ်နိုင်ပေ\သို့ရာတွင်အောက်ပါ အကြောင်းသုံးရပ်ကြောင့်သားသမီးများသည် မိဘအမွေ ဆက်ခံနိုင်ခွင့်ဆုံးရှုံးခြင်းခံရပေသည်သူတစ်ပါးအား မွေးစားရန်ပေးအပ်ခံရခြင်းမိဘများကွာရှင်းပြတ်စဲကြပြီးနောက် သားသမီးဖြစ...

Download Yuzanar Land's Mobile Apps

Get latest properties in email!

ဘာကြောင့် ယူဇနာမြေ ကို ရွေးချယ်သင့်သလဲ?

  • www.yuzanarland.com ဟာ မိတ်ဆွေအတွက်ပါ။
  • အိမ်၊ ခြံ၊ မြေ ရောင်း / ဝယ် / ငှား ခြင်းလုပ်ငန်းနှင့်အတူ ဆက်နွယ်သော လုပ်ငန်းများစွာကို
  • တစ်ဦးတစ်ယောက်ချင်း သီးခြားလုပ်ကိုင်သော အကျိုးဆောင်များ နှင့်
  • အကျိုးဆောင် ကုမ္ပဏီကြီး များအတွက် သာမက
  • ပိုင်ရှင်ကိုယ်တိုင်များ အတွက်ပါ တိုက်ရိုက် ကြော်ငြာနိုင်ရန်
  • ကိုယ်ပိုင် Dashboard ဖြင့် စိတ်ကြိုက် ပြင်ဆင် ရောင်းဝယ်နိုင်ပြီး
  • မိမိကိုယ်ပိုင် အိမ်ကဲ့သို့သော်၎င်း ရုံးခန်း တစ်ခုကဲ့သို့ သော်၎င်း
  • လွတ်လပ်စွာ ရောင်း ဝယ်နိုင်ဖို အတွက် အထူးစီမံထား သော Online အိမ်၊ ခြံ၊ မြေ ရောင်း၊ ဝယ်၊ ငှား Website ကြီးဖြစ်ပါသည်။
Read More »

ဆက်သွယ်ရန်

Copyright © 2020 | All rights reserved by Yuzanar Land Real Estate