အိမ်မြေ ၀ယ်ယူနေထိုင်ပြီး နှစ်ကာလကြာမှ မှတ်ပုံတင် အရောင်းအ၀ယ် စာချုပ်ချုပ်ဆိုလျှင်

    ရုံးခန်း၌ စာရေးသူ ရှိနေစဉ် စာဖတ် ပရိသတ် တစ်ဦးပါဟု မိတ်ဆက် ၍ 

အသက်ငါးဆယ် ခန့်အရွယ် အမျိုးသားတစ်ဦး ရောက်ရှိ လာပါသည် ။

'' ဟုတ်ကဲ့ ၊ ထိုင်ပါခင်ဗျာ ။  ကျွန် တော်ဘာများ အကူအညီပေးရမလဲ'' 

ဟုခရီးဦး ကြိုပြု လိုက်ပါသည် ။

''လွန်ခဲ့တဲ့နှစ် အစိတ်လောက်ရှိပြီ ဆရာ ။ အမေ့အမည်ရယ် ၊ ကျွန်တော့် 

အမည်ရယ်နဲ့ အခုနေတဲ့ အိမ် မြေကို ဝယ်ခဲ့တယ်''

''ဂရန်မြေလား ၊ ဘယ်လိုမြေ အမျိုးအစားလဲ ''

'' ဂရန်မြေပါ ဆရာ ။ ယာယီ မှတ်ပုံတင် အရောင်းအဝယ် စာချုပ်ချုပ် ဆိုထားပြီး

 ဆက်မသွား ဖြစ်တော့ဘူးဆရာ ။ အခုမှ ကြည့်မိပြီး သိရတယ် ။ ဘယ်လို 

ဆောင်ရွက်လို့ ရမလဲဆိုတာ သိချင်လို့ပါ ''

''ဘယ်လိုဖြစ်လို့  နှစ်ပေါင်း ၂၅ နှစ်လောက် ကြာသွားရတာလဲ''

''ကျွန်တော်က နိုင်ငံခြားမှာ အလုပ်လုပ်တော့ ဒီကိစ္စကိုလည်း သတိမရတော့ဘူး 

ဆရာ ။ အခုမှ ဂရန် သက်တမ်း ကုန်ခါနီးဖြစ်တော့ ကြည့်မိရာကနေ သတိပြုမိရတာပါ ''

''ရောင်းသူက ဘယ်မှာရှိတယ် ဆိုတာ သိပါသလား''

'' ဘယ်ပြောင်း သွားတယ် ဆိုတာလည်း မသိဘူးဆရာ ။ သူကိုယ်တိုင်လည်း သက်ရှိ 

ထင်ရှားရှိ မရှိ မသိတော့ဘူး ''

'' ရောင်းသူနဲ့ ဆက်စပ်တဲ့ သားသမီး ဆွေမျိုးတွေလည်း ဘယ်မှာနေ မှန်းမသိဘူးပေါ့ ''

''ဟုတ်တယ်ဆရာ ၊ ကျွန်တော် ကလည်း နိုင်ငံခြားမှာ အနေများ တော့ ဘယ်သူနဲ့မှ 

အဆက်အသွယ် မသိဘူး ။ ပိုဆိုးသွားတာက အမေကလည်း ပြီးခဲ့တဲ့လပိုင်းက 

ဆုံးသွားတော့ ဘယ်လိုမှ ဆက်စပ် မသိတော့ဘူး''

'' ဂရန် စာချုပ်တော့ မူရင်း ရှိတယ်ပေါ့ ''

'' ဟုတ်ကဲ့ ရှိပါတယ် ။ စာချုပ် စာတမ်းရုံးကို သွားမေးကြည့်တော့ ယာယီစာချုပ်က 

သက်တမ်းကာလ ကုန်သွားလို့ ဆက်ချုပ်ဆို မရတော့ဘူး ။ တရားရုံးမှာ တရားစွဲဆောင် 

ရွက်ရမယ်ပြောပါတယ် ။ ဒါကြောင့် ဆရာ့ဆီ လာရောက် ဆွေးနွေးတာပါ''

''ဂရန်အမည်ပေါက်က စာချုပ်ပါ ရောင်းသူအမည်ပဲ မဟုတ်လား''

''ဟုတ်ပါတယ် ဆရာ''

'' ရောင်းသူရဲ့ အမွေဆက်ခံသူ သားသမီးတစ်ဦး တစ်ယောက်နဲ့ ဆက်သွယ် မိရင်တော့ 

လွယ်ကူသွားတာပေါ့ ။ ရောင်းသူကိုယ်တိုင် သက်ရှိ ထင်ရှားရှိနေရင် ပိုအဆင်ပြေတယ် ။ 

အခုတော့ လိပ်စာလည်းမသိ ဖြစ်နေတယ် ။ ဒီတော့ ပထမဦးဆုံး အနေနဲ့ သတင်းစာထဲမှာ 

ရောင်းသူကို စာချုပ်စာတမ်း မှတ်ပုံတင် ချုပ်ဆိုပေးဖို့ အကြောင်းကြားစာ သဘောထည့် 

သွင်းကြေညာရမှာဖြစ်တယ် ''

'' လိပ်စာ မသိတော့ ဘယ်လို ထည့်မလဲဆရာ ''

''ယခင်လိပ်စာပဲ ထည့်ရမှာပေါ့ ။ ယခု လိပ်စာ မသိပေါ့ ။ လိပ်စာ သိရင်တော့ တိုက်ရိုက် 

နို့တစ်စာပေးပို့ လို့ရတယ်လေ ''

'' ယခင်လိပ်စာက အခုကျွန်တော် တို့ ဝယ်နေတဲ့ အိမ်လိပ်စာပဲ ဆရာ ''

အင်းပေါ့ အဲဒီလိပ်စာကို ယခင် လိပ်စာအဖြစ် ထည့်သွင်း ဖော်ပြရမှာ ဖြစ်တယ် ။

 ယခု နေရပ်လိပ်စာ မသိလို့ ဖော်ပြပြီး အရောင်းအဝယ် မှတ်ပုံတင်စာချုပ် ချုပ်ဆိုပေးရန်

 ဆက်သွယ်ဖို့နဲ့ သတ်မှတ်ရက် ကျော်က ဥပဒေနဲ့အညီ ဆောင်ရွက်မယ်လို့ ကြေညာရမှာ ဖြစ်တယ် ''

'' သတ်မှတ်ရက် ကျော်သွားရင် တရားစွဲရမှာလား ဆရာ ''

''ဟုတ်ပါတယ် ။ အိမ်မြေ အရောင်းအဝယ် မှတ်ပုံတင် စာချုပ်ချုပ် ဆိုပေးစေလိုမှုအဖြစ် 

တရားရုံးမှာ တရားစွဲဆို ရမှာဖြစ်ပါတယ် ။ တစ်ခု အဆင်ပြေသွားတာက ဝယ်ထားတဲ့ 

အိမ်မြေကို လက်ရောက်ရယူနေထိုင် နေတဲ့အတွက် အရောင်းအဝယ်က အထမြောက်တဲ့ 

သဘောရှိနေပါတယ်''

'' ဆရာပြောသလို ၊ လက်ရောက် ရယူမနေထားရင် ဘယ်လို ဖြစ်နိုင်ပါသလဲ''

''အဲဒီလို အခြေအနေ မျိုးဆိုရင် မှတ်ပုံတင် အရောင်းအဝယ် စာချုပ်ချုပ်ဆို ပေးရန်အပြင် 

ပစ္စည်းလက် ရောက်ပါ စွဲဆိုရပါတယ် ။

အဲဒီမှာ ပြဿနာရှိတာက ကိုယ်မသိလိုက်ပဲ အိမ်မြေပိုင်ရှင်က တစ်ဦးတစ်ယောက် ကို 

ရောင်းထားတာတွေ အခြားဆွေ မျိုးများနေထိုင်လျက်ရှိနေတာတွေရဲ့ ကြုံရတတ်တယ်''

'' အဲဒါ မျိုးဆိုရင် နေတဲ့သူပါ ထည့်ပြီး တရားစွဲ ရမှာပေါ့နော် ''

'' ဟုတ်ပါတယ် ။ သူတို့ကလည်း သူတို့ရဲ့ ပိုင်ဆိုင်ခွင့် ၊ နေပိုင်ခွင့်နဲ့ ထုချေတတ် တာကြောင့် 

အခက်အခဲရှိ လာတယ် ။ အခုကိစ္စကတော့ မြေနဲ့ အိမ်က မိမိ လက်ဝယ်မှာရှိပြီး နေထိုင် 

လျက်ရှိတာကြောင့် ပိုင်ဆိုင်မှုအငြင်း ပွားစရာ မရှိတော့ဘူးပေါ့ ''

''အခုထပ်ပြီး ချုပ်ရင်၊ ယာယီ မှတ်ပုံတင် အရောင်းအဝယ် စာချုပ်ကို ပထမဆုံး ထပ်ချုပ်

 ရဦးမှာလား ဆရာ ''

'' အခုခေတ် ကာလမှာတော့ ယာယီမှတ်ပုံတင် အရောင်းအဝယ် စာချုပ်အဆင့် မရှိတော့ဘူး ။ 

ယခင်က ယာယီ မှတ်ပုံတင် စာချုပ်ပြုလုပ်တယ် ဆိုတာက တံဆိပ်ခေါင်းတွေ ထပ်ကပ် ရန် လို မလို ၊ 

အိမ်မြေ တန်ဖိုး စိစစ်ရေး အဖွဲ့က ကွင်းဆင်း စစ်ဆေးတာတွေ ၊ အမြတ်ခွန် ထမ်းဆောင် 

တာတွေအတွက် ဆောင်ရွက်ဖို့  ယာယီလက်ခံ ထားတာပဲ ဖြစ်တယ် ။ တန်ဖိုး စိစစ်ရေး အဖွဲ့ရဲ့

 တင်ပြချက်အရ အမြတ်ခွန် ဆောင်ခြင်း လိုအပ်သည့် တံဆိပ် ခေါင်းထပ်မံ ထမ်းဆောင်ခြင်း

 ပြုပြီးမှ ယာယီ မှတ်ပုံတင် စာချုပ်ကို မှတ်ပုံ တင်အရောင်းအဝယ် စာချုပ်အဖြစ် ချုပ်ဆိုပေးတာ

 ဖြစ်ပါတယ် ''

'' အခုတော့ အခွန်ဆောင်တာ အရင်လုပ်ရတယ်လို့ ကြားတယ် ဆရာ ''

''ဟုတ်ပါတယ် ။ ပထမဦးဆုံး မြေပုံ မြေရာဇဝင် ကူးရတယ် ။ ပြီးရင် တန်ဖိုးစိစစ်ရေး အဖွဲ့ထံ 

တင်ပြရတယ် ။ လိုအပ်တဲ့ ဝယ်ခွန် ထမ်းဆောင်ပြီးမှ စာချုပ်စာတမ်းရုံးမှာ အရောင်းအဝယ် မှတ်ပုံတင် 

စာချုပ်ချုပ်ဆို ပေးပါတယ် ''

'' ကျွန်တော်တို့ကိစ္စက တရားစွဲ တယ်ဆိုတော့ ဘယ်သူ့ကို တရားစွဲရမှာလဲ ။ ရောင်းသူကို စွဲရမှာလား ''

''ဟုတ်ပါတယ် ။ သတင်းစာထဲမှာ ဆက်သွယ်ဖို့ အကြောင်းကြား ပေမယ့် အဆက်အသွယ် မရလို့ 

တရားရုံး မှာ ရောင်းသူကို တရားစွဲဆိုရမှာ ဖြစ်ပါတယ် ''

'' အရောင်းအဝယ် မှတ်ပုံတင် စာချုပ်ချုပ်ဆို ပေးစေလိုမှုအဖြစ် တရားစွဲရမှာပေါ့ ''

''ဟုတ်ပါတယ် ။ တရားရုံးကလည်း သတင်းစာကနေ ရုံးချိန်းလာ ရောက်ဖို့ သမ္မာန်စာ

 ( အကြောင်း ကြားစာ ) ထည့်သွင်း ကြေညာပါတယ် ။ ကြေညာခကိုတော့ မိမိက တာဝန်ယူ ရမှာဖြစ်တယ်''

'' တရားရုံးကိုလည်း မလာဘူးဆိုရင် ဆရာရယ် ၊ ဘယ်လိုဖြစ်နိုင်သလဲ ''

''တရားသူကြီးက တစ်ဖက် သတ်လျှောက်ထားသူကို စစ်မယ် ၊ သက်သေ စစ်မယ် ၊ စာရွက်စာတမ်းအရ

 ဝယ်ယူထားပြီး လက်ရှိ နေလျက်ရှိတာ ပေါ်လွင်မယ် ။ နှစ်ပေါင်း ၂၅ နှစ်အတွင်း ဘာကြောင့် 

မလျှောက် ထားရကြောင်း အကြောင်းပြချက် ခိုင်မာရင် ရောင်းသူအဖြစ် တရားရုံးရှိ ဘိလစ်က 

တာဝန်ယူလက်မှတ် ရေးထိုးပြီး အရောင်း အဝယ်မှတ်ပုံ တင် စာချုပ်ကို မှတ်ပုံတင်ရုံးမှာ ချုပ်

 ဆိုခွင့်ရသွားမှာဖြစ်ပါတယ်''

''ဒါဆိုရင် တရားရုံးက တာဝန် ယူဆောင်ရွက် ပေးတဲ့ သဘောပေါ့''

''မှန်ပါတယ် ။ ဒါကြောင့် တရားရုံးမှာ တရားစွဲ ဆောင်ရွက်ရမယ် ဖြစ်ပါတယ် ''ဟု 

အကြံပြုဆွေးနွေး လိုက်ပါသည် ။

Credit to copy