ကျွန်မသမီးနဲ့ မင်္ဂလာဆောင်ပြီး သူ့ယောကျာ်းဘက်က ရိုးရာဓလေ့အရ “နတ်” ပြမယ်ဆိုပြီး ခေါ်သွားပါ တယ် ။ နှစ်လလောက်အကြာမှာ ပြန်ရောက်လာကြပြီး ယောက်ျားဖြစ်သူက အိမ်ကထွက်သွားပါတယ်

         ကျွန်မသမီးနဲ့ မင်္ဂလာဆောင်ပြီး သူ့ယောကျာ်းဘက်က ရိုးရာဓလေ့အရ  “နတ်” ပြမယ်ဆိုပြီး ခေါ်သွားပါ တယ် ။ နှစ်လလောက်အကြာမှာ ပြန်ရောက်လာကြပြီး ယောက်ျားဖြစ်သူက အိမ်ကထွက်သွားပါတယ် ။ မယူနိုင်တော့ဘူးလို့လဲ ဖုန်းဆက်ပြောပါတယ် ။ ကျွန်မသမီးဖက်က နစ်နာမှုတွေ ရှိနေပါတယ်။ ဘယ်လိုဆက် လုပ်ရမလဲဆိုတာ ဖြေကြားပေးပါရှင် ။
=======================
           ရာဇသတ်ကြီး  ဥပဒေပုဒ်မ ၄၁၇ ပေါ့ ။သူကတော့ ခန္ဓာကိုယ်ကို လိမ်လည်ပြီး ရယူတာပေါ့ ။ ဒါနဲ့လဲ ဆက်နွယ်တာပေါ့။ ဥပမာ အမျိုးသားတစ်ဦးက အမျိုးသမီးကို လက်ထပ်ယူမယ် ပြောတယ် ။ ယုံအောင် ပြောတယ် ။ ယုံအောင် ပြောပြီးမှ သူ့ရဲ့ခန္ဓာကိုယ့်ကို ရယူလိုက်တယ် ။ ပြီးတော့မှ မယူဘူး ။ မယူတာနော် ၊ သူက ယူမယ်ပြောပြီးတော့မှ ခန္ဓာကိုယ့်ကို ရယူတယ် ပြီးတော့မှ တကယ် လက်ထပ်မယူရင် ဒါဟာက ဖြားယောင်း သွေးဆောင်းပြီးတော့ လိမ်လည်ပြီးတော့မှ ကာမကို ရယူတဲ့အတွက် ၄၁၇ အရ အပြစ်ရှိတယ်။ ၄၁၇ နဲ့တရားစွဲ လို့ရတယ်။  ဒါပေမဲ့ ဒီကိစ္စက တစ်မျိုးဖြစ်သွားတယ် ။ ဘာဖြစ်လို့လဲဆိုတော့ ပထမ သူ့က အိမ်ထောင်ပြုလိုက်သေးတယ်။ အိမ်ထောင်ပြုလိုက်ပြီးတော့မှ နတ်ပြဖို့ ဆိုပြီးတော့ သူ့က ခေါ်သွားတာ ။ ပြန်လာပြီးတော့မှ မယူနိုင်ဘူး ပြောတာ ။ ဆိုတော့ကာ ဒီအိမ်ထောင်ပြုလိုက်တဲ့ အတွက် ၄၁၇ ဝင် မဝင် ဆိုတဲ့ ပြဿနာပေါ့ ။ 

       တစ်ခုရှိတယ်ကွယ့် အလားတူ စီရင်ထုံး တစ်ခုရှိတယ် ။ အလားတူ စီရင်ထုံးဆိုတာက ပြည်ထောင်စုမြန်မာနိုင်ငံနဲ့ ကိုမြသန်းနဲ့ ၁၉၆၆ ခုနှစ် မြန်မာနိုင်ငံ စီရင်ထုံး စာမျက်နှာ ၁၃၆ပေါ့ ။ အဲ့ဒီမှာကတော့ ဒီကိုမြသန်း က ဒီမိန်းကလေးကို ရဝတရုံးမှာ လက်ထပ်ယူတာ ရဝတရုံးက လူကြီးတွေရှေ့မှာ လက်ထပ်ယူတာ ။ လက်ထပ်ယူပြီးတော့မှ ပေါင်းပြီးတော့မှ နောက်ဆက်မပေါင်းဘူး။ ဘယ်လို မပေါင်းဘူးလဲဆိုရင် သူ့က မွတ်ဆလင်ဘာသာဝင် ငါတို့ အစ္စလမ်ဘာသာဝင်တွေ အနေနဲ့ လက်ထပ်ပြီးတော့မှ အတူတူနေမယ်လို့ သူ့က ဒီလိုပြောတာ ။

       အဲဒီအမှုမှာ တရားရုံးများက သုံးသပ်တဲ့အခါကျတော့ ဒီဥစ္စာ တကယ် လက်ထပ်တာလား ။ ဒါမှမဟုတ်ရင် လက်ထပ်ယောင် ဆောင်ပြီး ခန္ဓာကိုယ်ကို ရယူသွားတာလား ။ အဲ့ဒီလိုစဉ်းစားတာ ဆိုတော့ သူ့က ဆက်ပြီး မပေါင်းတော့ဘူး ။ ပေါင်းမယ်ဆိုရင် သူ့ဘာသာနဲ့ လက်ထပ်ပြီးမှသာ တရားဝင်။ သူ့က အတူတူနေမယ် ပြောတာကိုဆိုတော့ ရဝတရုံးမှာ လက်ထပ်တယ်ဆိုတာက တကယ်ကော ဟုတ်ရဲ့လား ။ ရည်ရွယ်ချက်ကကော မှန်ရဲ့လားဆိုတဲ့ အဖြေပေါ်မူတည်ပြီးတော့ အဲ့ဒီအမှုမှာ ကိုမြသောင်းက အပြစ်ပေးခံရတာတွေ့ရတယ် ၄၁၇နဲ့ ။ 

           ဒါကြောင့်မို့ ဒီမှာလည်းပဲ အကဲခတ်ဖို့က ဒီဖြစ်စဉ်ကို အကဲခတ်တဲ့အခါမှာ အပေါ်ယံလေး အကဲခတ်လို့ မရဘူးပေါ့ ။ သူတို့မင်္ဂလာ ဆောင်တာပဲ ၊ မင်္ဂလာဆောင်တော့ ၄၁၇ မြောက် ပါ့မလား ။ ဒီလိုပဲ တစ်ဖက်က တွေးတာပေါ့ ။ ဒါပေမဲ့ မင်္ဂလာဆောင်ခြင်းသည်လည်း စောစောက ပြောသလို အပေါ်ယံ ဟန်ပြလောက် ဆောင်တာလား ။ တကယ်ကို သူ့တို့ နှစ်နှစ်ကာကာ ဆွေတွေမျိုးတွေနဲ့ သိုက်သိုက်ဝန်းဝန်းနဲ့ တခါတည်း မင်္ဂလာဆောင်ပွဲကြီးကို ကျင်းပတာလား ဆိုတဲ့ဟာကို အဖြေထုတ်ရသေးတယ်။ အဲ့ဒါတွေကို အကဲခတ် ရသေးတယ်။ 

              အဲ့အပေါ်မူတည် ပြီးမှသာလျှင် ဒါဟာ အပေါ်ယံလုပ်သွားတာဆိုရင် တော့ သူ့ရဲ့ရည်ရွယ်ချက်ကိုက လက်ထပ်တယ်ဆိုတဲ့ ဟာလေးတော့ ဖြစ်ပြီးတော့မှ သူက ခန္ဓာကိုယ်ကို ရယူမယ် ၊ နောက်မှ မပေါင်းဘူးဆိုတဲ့ ရည်ရွယ်ချက်များ ရှိသလား ဆိုတာကို ကြည့်တာပဲ ။ အဲ့ဒီရည်ရွယ်ချက် ရှိတယ်ဆိုရင် ၄၁၇ မြောက်တယ်။ ဒါကြောင့်မို့ အပေါ်ယံကြည့် လို့မရဘူး ။ အဲ့ဒီဖြစ်စဉ်ကိုမှ ဘယ်လိုမင်္ဂလာဆောင်တာလဲ ဘယ်လို မင်္ဂလာပွဲ ကျင်းပသွားသလဲ ဆိုတဲ့အခြေအနေကို သုံးသပ်ပြီးမှသာလျှင် ဒါက ၄၁၇ မြောက်နိုင်တယ် ။ မမြောက်နိုင်ဘူးဆိုတာကို အဖြေထုတ်လို့ရတယ် လို့ဘဲ ဖြေချင်ပါတယ်။
#DVBlawlab #DVBtvnews #၄၁၇